KPA ta urgi pa paga tino pa tendencia di “scam”
ORANJESTAD - Cuerpo Policial kier informa y conscientisa tur hende pa tendencia di “scam” cu ta pasando den e ultimo tempo aki.
Mester tene cuenta cu e siguiente informacion cu KPA lo comparti. Ta importante pa paga tino riba e caso aki of tambe casonan parecido na esaki.
Ta asina cu lo tin un hende ta post riba rednan social cu e lo tin un auto na benta. E mes no ta biba na Aruba. Supuestamente e mester a bay su Pais y a laga un auto atras cu e tin na benta.
E persona cu ta interesa den e auto lo tin cu mand’e e placa, via un negoshi cu ta manda placa pa esnan cu ta biba den exterior y despues cu e persona aki (doño di e auto) ricibi e code pa cu e pago di e auto, e ora ey e lo manda un persona pa entrega e auto na e cumprado. Esaki NUNCA ta sosode!
POLIS kier a adverti tur hende pa paga tino y no cay den tipo di scam asina.
Aki tin un par di tips pa abo NO cay den trampa:
- NO manda placa pa un auto cu bo no a wak tampoco a test;
- Sea mas consciente cu loke bo ta cumpra riba rednan social;
- NO manda niun informacion di bo, manera bo cuenta di banco of personalia na persona falso of desconoci;
- Wak pa profilenan falso riba rednan social manera “nomber falso of potretnan falso”;
- Si tin indicacion cu bo por ta victima di un caso di “scam” entrega keho na recherche.
Ban sea mas consciente y paga tino pa casonan asina.
Si bo sa algo of tin cualkier informacion y bo kier keda anonimo yama e tiplijn di polis cu ta 11141.
