Kingdom Startup Program - Inversion den talento hoben ta inversion den futuro economico di Aruba

Kingdom Startup Program ta un programa piloto di seis siman cu ta reuni studiantenan universitario di Aruba, Corsou y Sint Maarten pa desaroya solucionnan innovador pa desafionan real cu e islanan ta enfrenta. Door di metodonan internacionalmente reconoci, guia di y cooperacion cu experto di Caribe, Hulanda y Merca, e participantenan ta desaroya ideanan di negoshi cu por contribui na un economia mas diversifica, competitivo y sostenibel.

Pa Minister di Finansa, Asunto Economico y Sector Primario Geoffrey Wever, inversion den comercio y innovacion no ta solamente inversion den negoshinan nobo, sino tambe den capacidad di nos mes hendenan pa crea e economia di mañan.

"Un pais no por logra desaroyo duradero solamente cu infrastructura of inversionnan financiero. E recurso mas balioso cu nos tin ta nos hendenan. Ora nos duna hobennan e conocemento, e oportunidad y e confiansa pa crea solucionnan, nos ta inverti den un economia mas fuerte, mas innovador y mas resiliente," minister Geoffrey Wever a comenta.

Fortalecemento di e ecosistema comercial ta un di e pilarnan di  maneho economico di Ministerio di Finansa, Asunto Economico y Sector Primario. Aruba mester sigui crea e condicionnan pa talento local por florece, desaroya ideanan nobo y crea actividad economico cu ta genera trabou y bienestar pa futuro.

Kingdom Startup Program ta ilustra con colaboracion entre gobierno, institucionnan educativo y sector priva por resulta den iniciativanan cu ta prepara e siguiente generacion di lidernan. E programa ta enfoca riba desaroyo di solucionnan local pa retonan den area di por ehempel salud, enseñansa, sostenibilidad y economia digital, mientras cu e ta stimula e participantenan pensa den termino di innovacion, liderazgo y creacion di balor.

E seis teamnan participante a haya e oportunidad pa participa den un conversacion directo cu Staatssecretaris Van der Burg unda nan a presenta nan proyecto, e progreso cu nan a logra y con nan proyecto por contribui na e futuro economico di nan respectivo islanan. E programa tambe ta crea un plataforma unico pa fortalece cooperacion entre Aruba, Corsou y Sint Maarten y pa stimula un sentido comparti di responsabilidad y desaroyo den Reino.

Cu iniciativanan manera Kingdom Startup Program, Gobierno ta sigui pone e fundamentonan necesario pa un economia moderno, dinamico, diversifica, y resistente, unda talento local, colaboracion den Reino y innovacion ta hunga un rol central den e desaroyo economico di Aruba pa e generacionnan cu ta bin.