Kapel Emanuel na San Nicolas lo bira e siguiente monumento oficial di Aruba

Como parti di e programa nobo, Gobierno lo inicia un proceso continuo di designacion di monumento, unda regularmente lo coloca un seyo oficial riba e edificionan cu a haya e status di monumento protegi. Tambe lo organisa varios anochi di informacion pa splica comunidad tocantee proceso y kico e status di un edificio como monumento ta nifica pa su doño. “E propietarionan ta keda doño di nan edificio. Tin oportunidad, tin apoyo y tin fondo special cu por yuda na restauracion. Nos kier cu nos comunidad ta bon informa tocante e posibilidadnan cu ta existi,” Prome Minister Mike Eman a splica.

Gobierno a anuncia oficialmente cu Kapel Emanuel na San Nicolas lo bira e siguiente monumento oficial di Aruba. E iniciativa aki a cuminsa durante e gestion di e anterior director di Monumenten Bureau, Yvonne Webb-Kock, y ta representa tambe un homenahe na su tata, arkitecto Virgilio Kock den feliz memoria, diseñador di e kapel Emanuel emblematico aki.

A  conduci e proceso di investigacion y documentacion historico cu apoyo di arkitecto di restoracion di monumento Daphne Every. Despues di varios estudio historico y conversacion cu e Obispado Catolico, a logra un acuerdo pa oficialisa e designacion di e kapel. Gobierno a expresa su gratitud pa e cooperacion y permiso brinda pa e Obispado.

Pastoor Andres Makowiec a expresa su orguyo cu e reconocimiento. “Nos ta hopi orguyoso cu un di nos edificionan ta haya e reconocimento aki. Mescos manera cu ciudadnan rond mundo ta aprecia nan catedralnan y iglesianan historico, Aruba tambe mester aprecia y proteha su patrimonio religioso y arkitectonico,” Pastoor Makowiec a declara. Segun e vicario, Kapel Emanuel tin e caracteristicanan unico den Aruba. Su forma triangular, inspira den Santisima Trinidad, y su ubicacion riba Ser’i Mosa di San Nicolas ta haci e un edificio singular cu tin gran balor spiritual y arkitectonico. 

Director di Monumenten Bureau Aruba, Raul Gei, a bisa cu e declaracion di Kapel Emanuel como monumento ta marca un momento special pa Aruba. “Esaki ta resultado di hopi trabou y investigacion. E kapel tin un gran balor historico y cultural. Nos ta invita henter comunidad, specialmente e habitantenan di San Nicolas, pa participa den e ceremonia y conoce mas tocante e patrimonio unico cu nos tin,” Gei a bisa.

Prome Minister Mike Eman a indica: 

“Pastoor Andres a referi na Antoni Gaudi y su obra monumental na España. Nos, humildemente, por bisa cu Aruba tambe tin su propio Gaudi den persona di Virgilio Kock, cu den e humildad di e circunstancianan di Aruba di su tempo a diseña algo hopi excepcional cu ta Kapel Emanuel.” Eman a remarca. “Den e calor di e kapel importante aki nos no solamente ta celebra arkitectura, pero tambe nos ta busca e palabra di Dios y e guia cu nos tur mester den un bida yen di reto y desafio. E edificio aki mester haci nos sinti emocion, sinti e presencia di nos creador y tambe recorda nos e responsabilidad cu nos tin pa cuida locual nos a hereda.” Cu e palabranan aki Prome Minister Eman a cera e mainta di momento di prensa.

Gobierno a anuncia tambe cu diahuebs 18 di juni 2026 na MFA Noord lo tin un atardi pa anochi di informacion unda comunidad por conoce mas tocante e proceso di declaracion di monumento, e responsabilidad di e propietarionan y e oportunidadnan di financiamiento disponibel pa restauracion. E charla ta cuminsa pa 6:30 pm.

Prome Minister a invita henter comunidad pa participa den e ceremonia oficial na Kapel Emanuel, riba diaranson 17 di juni 2026 di 6.00 pa 8.00 pm unda despues di misa lo coloca e seyo oficial di monumento protegi den presencia di famia Kock, entre nan Monica y Yvonne Kock, pa honra e memoria di Virgilio Kock, un gran arkitecto y diseñador Arubiano cu a laga un legado duradero pa Aruba.