Jurima Bryson a huramenta como e prome Ombudsman di Pais Aruba

Esaki ta un dia historico pa pais Aruba, mirando cu e proceso pa yega na un Ombudsman a tuma hopi aña.

E trayecto pa un ombudsman a cuminsa na aña 1997, na momento cu un miembro di parlamento a cuminsa cu e iniciativa pa bin cu un ombudsman, pero no a logra concretisa e ley. Despues di varios aña y trabao incansabel, awo si Aruba tin su Ombudsman. 
Sahaira Kelly, como "kwartiermaker", tabata encarga pa set up ful e oficina di e ombudsman y pa trek e proyecto. Danki na su diplomacia, conocemento, esfuerso y dedicacion, cu Aruba tin su Ombudsman.

E trabao di Ombudsman, ta pa asisti ciudadanonan cu ta sinti cu nan ta hayando un trato inhusto of desigual. Ombudsman tey pa defende e pueblo. Unabes cu un persona entrega un keho, lo cuminsa un investigacion, lo traha un conseho y lo mand’e pa Gobierno cu lo sigui e proceso segun e conseho di e Ombudsman.