John van der Zwan y delegacion na Aruba: Cooperacion den Reino ta fortalece preparacion pa situacionnan di crisis

E miembronan di e delegacion, cu ta consisti di John van der Zwan, Joke Vroegop y Johnson, un hoben profesional Arubiano cu ta traha pa e ministerie van Binnenlandse Zaken en Koninkrijksrelaties (BZK), a comparti cu Prome Minister un relato di e trabou haci y e recomendacionnan cu a resulta for di e proceso.

E proceso aki a inicia den un momento cu tensionnan entre Venezuela y Merca tabata intensifica y Gobierno di Aruba a considera importante pa no laga ningun scenario haya nos sin preparacion. Den e cuadro ey, Prome Minister Eman a haci un peticion na Hulanda pa sostene Aruba cu experiencia y conocemento adicional den preparacion y maneho di crisis.

Hulanda a responde positivamente na e peticion y John van der Zwan a keda disponibel pa traha hunto cu Aruba. Durante su estadia, Van der Zwan a colabora estrechamente cu Crisis Management Office (CMO) y diferente profesional local, combinando experiencia for di Reino cu e conocemento y realidad local di Aruba.

Segun Prome Minister Eman, Aruba ya tin un bon reputacion tanto den Reino como den region pa su nivel di preparacion y capacidad pa actua den situacionnan excepcional. Sinembargo, preparacion pa crisis ta un proceso cu nunca ta termina.

“Nos por ta bon prepara, pero semper tin espacio pa mehora. E meta ta pa nos comunidad, nos institucionnan y nos profesionalnan ta prepara y entrena hunto, pa ora un situacion presenta, nada no sorprende nos,” Prome Minister a indica.

Un aspecto importante den e siguiente fase lo ta precisamente implementacion di e recomendacionnan cu Van der Zwan y su team a formula hunto cu e profesionalnan local. Gobierno lo sigui traha cu e diferente partnernan pa fortalece coordinacion, entrenamento y capacidad di reaccion di Aruba.

Prome Minister Eman a expresa su gradecimento na John van der Zwan, na e profesionalnan local y na partnernan den Reino cu a haci e cooperacion aki posibel.

Pa Gobierno, e trabou ta parti di un compromiso continuo pa mantene Aruba prepara: no solamente pa responde ora un crisis presenta, sino principalmente pa anticipa, practica y traha hunto prome cu e necesidad presenta.