Jeugdgezondheidszorg (JGZ) ta celebra awe, riba 20 di November, Dia Internacional di Derecho di Mucha y Hoben
ORANJESTAD - Riba Dia Internacional di Derecho di Mucha y Hoben, Jeugdgezondheidszorg, como parti di Directie Volksgezondheid (DVG), kier pone e enfasis ariba nos compromiso pa protega y promove e derechonan di cada mucha y hoben cu ta biba na Aruba.
Como organisacion nos ta traha diaramente y ta enfoca specialmente riba un bon salud for di un punto di bista holistico (emocional, mental, fisico, social, esencia di bida y identidad).
JGZ ta kere cu cada mucha tin e derecho di tin un comienso di bida saludabel, optimal y cu cada mucha tin e derecho di prospera den bida!
"Salud y bienestar di muchanan ta esencial pa nan desaroyo y muy en particular pa nan futuro".
Nos ta convenci cu cada mucha y hoben tin e derecho pa un cuido di salud y bienestar di calidad halto, un bon educacion y proteccion contra abuso y descuido. JGZ ta traha diaramente ariba e derechonan di e mucha y hoben pa medio di:
Duna cuido preventivo, informacion y sosten na mucha, mayornan of otro educadornan (scol, centro di cuido) ora tin problema di salud;
Señala, reconoce y trata problema di salud tempran y referi na e cuido necesario;
Sostene mayornan, educadornan, scolnan cu muchanan cu problema di salud of desaroyo;
Traha hunto cu otro instancianan pa duna un ayudo of cuido integral;
Acumula dato di salud y bienestar y traha riba maneho di salud hubenil.
Aruba, laga nos tur traha hunto pa protega e derechonan di tur mucha. Tur mucha tin e derecho di tin un desaroyo sano y hiba un bida feliz y prospero.
