Inversion den proyecto di revitalisacion San Nicolas

Durante e ultimo lunanan, Ministerio di Asunto Economico, den consulta cu varios stakeholder, a traha un plan pa revitalisa e area central di San Nicolas. Despues di finalmente a ricibi aprobacion di e conseho di minister pa aloca fondo adicional, e proyecto aki ta cla pa ehecuta, y lo inicia cu un destaho publico na comienso di october.

Na 2022, durante e inicio di gobernacion, a organisa un YES Summit caminda diferente stakeholder y miembro di e comunidad di San Nicolas a haya invitacion pa dialoga riba temanan crucial pa desaroyo di e area. Basa riba e feedback ricibi durante e YES Summit, a desaroya un plan holistico pa revitalisa San Nicolas, den diferente fase.

E vision ta pa e proyecto conecta e centro di San Nicolas cu lama. Un di e sugerencianan ricibi tabata pa crea un conexion entre e mainstreet di San Nicolas pariba y e mainstreet pabou, cu actualmente ta separa den dos area.

Fase 1 lo inclui e creacion di un Sunrise Market den e parkeerplaats actual di Arubus, mantencion y modernisacion di e terminal di bus, ampliacion di e espacio publico pa peaton, y e desaroyo di espacio publico cu posibilidad pa precario, pa asina por crea espacio pa terras y actividad di horeca. Tambe lo tin mas iluminacion, mata y infrastructura cu ta atractivo pa bishitantenan.

Esaki ta un proyecto di 4.3 miyon Florin for di fondonan publico di Pais Aruba. E proyecto ta un colaboracion cu e ministerio di Transporte y Naturalesa, bou cual e tereno di Arubus ta resorta. E creacion di e Sunrise Market ta representa un oportunidad pa agricultor- y artesanonan, cu lo haya espacio pa ofrece productonan local, algo cu hopi tempo a desea y ta necesario pa diversifica locual San Nicolas tin di ofrece, no solamente pa turista, pero tambe pa localnan cu por disfruta di e area regularmente. Den e dianan siguiente lo haci e desvelo oficial di e proyecto aki.