Inscripcion pa Prueba di Naturalisacion
ORANJESTAD - Seccion Examens en Toetsen di Departamento di Enseñansa Aruba (DEA) ta informa cu inscripcion pa e Prueba di Naturalisacion ta habri entrante 1 di juli 2026 pa 8’or di mainta.
E biaha aki por inscribi solamente pa e 4 pruebanan di Hulandes nivel A2, cu ta Lezen, Luisteren, Schrijven en Spreken.
E aña aki no ta habri inscripcion pa prueba di OC & OE (Orientacion di Comunidad y Orientacion Estatal), tampoco prueba di pa Papiamento nivel A2.
Pa inscribi pa e Prueba di Naturalisacion 2026 mester yena un formulario di inscripcion digital cu por haya riba nos website entrante 1 di juli 2026. Por haya mas informacion via e pagina Naturalisatietoets.
Pa bo por inscribi bo tin mester di un Gmail adres. No por uza otro e-mail adres pa inscribi. Nos no ta acepta inscripcion na balie of via e-mail adres naturalisatietoets.aw@gmail.com ni tampoco naturalisatietoets@ea.aw.
Inscripcion ta habri dia 1 juli 2026 pa 8’or di mainta. Na momento cu esaki yena, ta cera e inscripcion.
Tene na cuenta cu na momento di inscribi mester upload e siguiente documentonan den pdf:
- un scan (pdf) di paspoort valido;
- un scan (pdf) extracto di registro civil di Aruba (papel di Censo di 5 florin, no mas bieu cu 6 luna);
- un scan (pdf) di e verklaring(nan) otorga (si acaso esak ta aplicabel pa bo persona);
- un scan (pdf) di e Certificado di Prueba di Naturalisacion di Papiamento/Hulandes otorga te cu 2010 (si acaso esak ta aplicabel pa bo persona);
- un scan (pdf) di bo diploma EPB-arbeidsmarkt of SPO y bo lista final di cifranan (si acaso esak ta aplicabel pa bo persona).
Di e inscripcionnan cu drenta nos ta acepta y procesa solamente inscripcionnan cu ta completo. Tene bon cuenta cu esaki. E candidato ta ricibi un e-mail pa confirma cu a haya su inscripcion. E prome tanda ta tuma lugar den luna di september 2026, e di dos tanda ta tuma lugar den luna di oktober 2026. E fechanan exacto cu e pruebanan lo tuma lugar ta wordo anuncia despues.
Mas informacion
Pa mas informacion tocante e Prueba di Naturalisacion por lesa e foyeto di informacion. Ta conseha tambe pa sigui e desaroyonan pa medio di Facebook of Instagram @educationaruba.
