Inicio oficial di trabounan na tres veld di futbol: Ayo, Arsenal y Washington

E proyectonan aki ta forma parti di e vision pa sigui modernisa infrastructura deportivo di Aruba y crea mas oportunidad pa desaroyo di futbol, particularmente pa nos muchanan y hobennan.

Cu inicio di e trabounan aki, e tres localidadnan lo beneficia di instalacion di mini turf veldnan moderno, creando espacionan deportivo cu ta contribui na desaroyo di talento futbolistico y ta stimula mas participacion den deporte. 

E renobacionnan aki ta contribui na creacion di un ambiente deportivo mas moderno y accesibel, caminda muchanan y hobennan por sigui desaroya nan habilidadnan, cultiva disciplina, fortalece trabou den ekipo y disfruta di deporte den nan propio bario.

Inversion den deporte ta inversion den futuro

Segun Minister di Deporte Gerlien Croes, infrastructura deportivo ta desempeña un rol esencial den desaroyo social y fisico di nos comunidad. E importancia di e proyectonan aki ta bay mas leu cu solamente renobacion di veldnan di futbol. Nan ta representa un inversion den bienestar, salud y futuro di nos generacionnan.

Cu e tres proyectonan actualmente den ehecucion, Ministerio di Deporte ta reafirma su compromiso pa sigui fortalece infrastructura deportivo den diferente bario di Aruba y crea mas espacio pa deporte y movecion.

Minister Croes ta gradici Fundacion Lotto pa Deporte pa ta parti di e proyecto y ta felicita e barionan di Ayo, Coba Lodo y Washington cu e inicio di e renobacionnan y ta expresa su entusiasmo pa e momento cu e veldnan nobo lo ta cla pa uzo.