Inicio di construccion di toren nobo na International Raceway Park ‘Palo Marga’

E momento historico aki a tuma luga durante e di dos dia di e evento One Cool Summer, marcando un paso importante den modernisacion di infrastructura di drag racing na Aruba.

E toren actual di Palo Marga a sirbi e comunidad di motorsport durante hopi aña. Cu e construccion di e toren nobo, e localidad deportivo aki ta prepara pa un etapa nobo, cu facilidadnan moderno pa beneficia coredonan, ekiponan tecnico, organisadornan y e publico amante di drag racing.

E construccion di e toren nobo ta representa un avance importante pa Palo Marga y ta contribui na e vision pa sigui fortalece Aruba como un localidad pa eventonan di motorsport na nivel local y internacional, tumando nota di recordnan personal nobo cu ta ser buta durante eventonan internacional cu coredonan di afo riba pista di Palo Marga. 

Colaboracion pa fortalece drag racing na Aruba

Minister di Deporte, Sra. mr. Gerlien Croes ta gradici Fundacion Lotto pa Deporte pa su sosten y financiamiento di e proyecto, cu ta haci e inversion aki posibel.

Gradiciendo tambe Arubaanse Bond van Motorsport pa su dedicacion, perseverancia y compromiso continuo cu desaroyo di motorsport na Aruba.

E colaboracion aki ta demostra e importancia di uni forsa entre Gobierno, organisacionnan deportivo y partnernan pa realisa proyectonan cu ta beneficia directamente nos deportistanan y comunidad.

Minister Croes ta felicita tur deportista, organisador, voluntario y amante di drag racing cu e inicio di e proyecto aki y ta premira cu entusiasmo pa e momento cu Palo Marga lo inaugura su toren nobo.