Inauguracion oficial di FIFA Arena Mini Turf na Noord y Pos Chikito
ORANJESTAD – Gobierno di Aruba, pa medio di Ministerio di Deporte, ta anuncia cu e proyectonan di FIFA Arena Mini Turf na S.C. United (Noord) y S.V. Unistars (Pos Chikito) a wordo inaugura oficialmente, marcando un logro significativo den desaroyo di infrastructura deportivo na nos isla.
Cu e inauguracion aki, tanto Noord como Pos Chikito awor ta conta cu nan prome FIFA Arena Mini Turf, brindando espacionan moderno, accesibel y safe pa comunidad, particularmente pa nos muchanan y hobennan.
E proyecto tin un colaboracion solido entre Gobierno di Aruba, Aruba Voetbal Bond (AVB), FIFA y Lotto pa Deporte. E iniciativa, cu a cuminsa algun luna atras, ta forma parti di un programa internacional di FIFA enfoca riba promove acceso, inclusividad y desaroyo di talento deportivo na nivel comunitario.
Minister di Relacionnan den Reino, Enseñansa, Hubentud, Innovacion y Deporte, Sra. mr. Gerlien Croes, a expresa su orguyo cu e realisacion di e proyectonan aki: “E logro aki ta mustra claramente con colaboracion entre partnernan local y internacional por resulta den impacto real pa nos comunidad. Nos ta creando oportunidad pa nos hubentud crece, desaroya y participa activamente den deporte”.
E vision ta pa sigui expande proyectonan similar den otro barionan, cu e meta di fortalece deporte, stimula movecion y promove desaroyo comunitario na Aruba.
Gobierno di Aruba ta reafirma su compromiso pa sigui inverti den infrastructura deportivo y pa traha hunto cu tur stakeholder pa asina sigui impulsando progreso den deporte pa Aruba.
Minister Croes a felicita S.C. United, districto di Noord, S.V. Unistars, bario di Pos Chikito, y tur esnan cu a contribui incansabelmente pa haci e proyectonan aki bira realidad.