Inauguracion di One of a Kind Café na MFA Paradera
ORANJESTAD - Diabierna 26 di september, a tuma luga inauguracion di One of a Kind Café na MFA Paradera, un proyecto cu ta hopi mas cu un café.
E ta un simbolo di speransa, oportunidad y inclusividad, creando espacio pa personanan cu limitacion pa desaroya nan talento, siña y traha cu orguyo den un ambiente cu ta duna nan balor y aprecio.
Un palabra di gran aprecio na Trampolin pa Trabao, mentornan, guia y partnernan di comunidad cu, cu nan compromiso, pasion y esfuerso, a haci e bunita proyecto inspirador aki un realidad. Sin nan fe den potencial humano, esaki no tabata posibel.
One of a Kind Café ta un muestra cu, ora nos pueblo y sector priva uni man, tur cos ta posibel. Aruba tin espacio pa tur hende, y tur hende ta berdaderamente “One of a Kind.”
Minister di Salud Publico, Asuntonan Social, Cuido di Adulto Mayor y Maneho di Adiccion, Mervin Wyatt-Ras ta reafirma su compromiso pa sigui promove inclusividad y respet den tur skina di nos comunidad, sigurando cu tur ciudadano tin oportunidad pa crece y contribui.
Ministerio di Salud Publico, Asuntonan Social, Cuido di Adulto Mayor y Maneho di Adiccion ta felicita Trampolin pa Trabao, MFA Paradera y tur esnan cu a traha riba e proyecto aki, y ta desea hopi exito na e café nobo.
Nos ta invita comunidad completo pa bin sostene, disfruta y celebra e talento cu ta briya den e espacio special aki.