Inauguracion di edificio renoba di Centro Colorado

Prome Minister, acompaña pa Minister di Husticia Rocco Tjon y representantenan di Stichting Hunto, a bati bel pa revela e trabaonan di renobacion cu a tuma luga na Centro Colorado.

E edificio di Centro Colorado, tabata den un estado deplorabel, pero na momento cu e hunta di directiva nobo a tuma over na 2019, a inicia cu cambionan inmediatamente. E renobacion ta nifica cu a amplia e cambernan pa cliente. Awor por ubica 40 cliente na e centro renoba. Banda di esaki, lo bay tin un seccion dedica solamente pa hende muhe, y tin profesionalnan cu ta guianan y brinda curso na cada un. Banda di e parti medico y emocional, tin actividadnan cu ta enfoca riba nan desaroyo a traves di trahadonan social, instructornan y mas.

Gobierno a pone prioridad na salud mental, escalando e tema aki na nivel di crisis, dunando asina e atencion necesario. Stichting Hunto tin un rol importante den combati problemanan di salud mental y trabao desplega ta papia pa su mes. Nan ta trece tur hende den e veld di salud mental hunto pa hiba discusion riba e tema, compronde, traha y colabora cu otro cu e solo meta di bin cu solucionnan pa e tema di salud mental.

Prome Minister ta gradici su colega Minister di Salud Publico Dangui Oduber y Minister di Husticia Rocco Tjon pa dedica asina hopi esfuerso den e Salud Mental, pero tambe tur empleado cu ta traha tur dia incansablemente pa yuda esnan cu ta sufri di e malesa aki.