Inauguracion di e edificio renoba di Maria Convent, un centro di educacion STEM

E ocasion historico ta marca final di un esfuerso conhunto pa crea un centro vibrante pa educacion den ciencia, tecnologia, ingenieria y matematica (Science, Technology, Engineering, and Math - STEM) na Aruba. E proyecto di 7,3 miyon euro, financia door di Union Europeo, a transforma e edificio di Maria Convent, di 2.000-meter cuadra, den un centro di educacion state-of-the-art. E edificio renoba awo ta conta cu cuater klas, dos kamber di server, un biblioteca bon ekipa, un auditorio, cinco sala di estudio, espacio pa oficina pa 30 miembro di personal y un laboratorio di computer cu ekipo ICT pa 40 studiante. 

Prome Minister di Aruba, Sra. Evelyn Wever-Croes, a expresa su gratitud pa e proyecto y loke e ta nifica pa Aruba.

Sr. Rene Van Nes, Embahador di UE, a declara di ta contento cu UE su contribucion pa brinda e hobennan di Aruba oportunidad di haya un educacion di calidad hopi halto na Aruba. 

Sr. Ugo Blanco, representante residente di UNDP, a comenta cu UNDP ta orguyoso di e iniciativa aki cu no solamente ta preserva e patrimonio cultural, sino tambe ta pone e fundeshi pa un futuro mas briyante y sostenibel.

Renobacion di Maria Convent ta priorisa sostenibilidad door di incorpora elemento cu ta  minimalisa impacto ambiental. E ta inclui un sistema di control climatico inteligente (smart) cu ta optimilisa eficiencia den uzo di energia, insulacion di dak (roof insulation) pa reduci consumo di energia, sistema di iluminacion smart pa spaar energia y un sistema di reuza awa pa irrigacion cu ta  conserva awa. 

E edificio renoba ta e programa SISSTEM di UA ta ubica, dedica na fomenta una base solido pa e programa SISSTEM. E inversion den educacion STEM ta crucial pa desaroyo continuo di Aruba, ya cu e graduadonan di SISSTEM lo ta ekipa pa enfrenta desafio grandi, manera sostenibilidad, energia renobabel y adaptacion na cambio climatico. Ademas e ta fortalece posicion di Aruba como lider den innovacion y responsabilidad ambiental denter di region Caribense. 

E proyecto di rehabilitacion di Maria Convent ta un esfuerso di colaboracion di Gobierno di Aruba, particularmente Ministerio y Departamento di Asunto Economico, Universidad di Aruba,  Monumentenbureau, UE cu a financia e proyecto y e ekipo di UNDP. E ta un ehempel di e importancia di traha hunto pa logra e obhetivonan di desaroyo sostenibel. 

E ceremonia di apertura ta subraya e balor di apoyo pa y inversion den proyectonan cu ta contribui na preserva patrimonio cultural, desaroyo sostenibel y inclusion social na Aruba y e region en general. E edificio Maria Convent ta un ehempel di progreso,   pa yuda e generacion di futuro lidernan di Aruba riba tereno di STEM.