Huurcommissie a presenta nan cuenta anual di 2024

For di e documento a sobresali cu na 2024 Huurcommissie a trata 296 caso na un manera eficiente y rapido. Ta di remarca cu un caso na Huurcommissie ta dura apenas 6 siman y no tin costo pa e partidonan concerni.

Huurcommissie moderno y profesional

Desde 2021 ministerio di Asunto Economico a bin cu e plan pa modernisa y profesionalisa Huurcommissie. E tempo ey a encontra un organisacion cu hopi retraso y cu falta di atencion pa por sirbi pueblo na un manera adecuado.

Den e cuadro aki a cambia e ley pa mehoracion di e funcionamento di Huurcommissie, a implementa un discripcion di funcion pa e miembronan y secretaris nobo. Asina por a busca miembronan nobo na un manera habri y transparente. Cu ayudo externo a logra recupera e retraso di tur e casonan pendiente na Huurcommissie. Tambe a inverti den e organisacion pa por a mehora e procesonan interno door di traha formatonan y modelonan standarisa y instruccion di trabou. Esaki ta pa garantisa e stabilidad, transparencia y eficiencia di Huurcommissie pa sigura cu ta  maneha e proceso legal y regulacion relaciona cu huur na un manera husto y efectivo.

Huurcommissie mas acesibel

Awendia Huurcommissie ta situa den centro di Oranjestad y ta un organisacion cu e ciudadano por conta riba dje. Minister Wever kier a gradici e presidente di Huurcommissie, Monica Kock, hunto cu e miembronan di Huurcommissie, e secretario di Huurcommissie y SEDECO pa tur e bon trabounan desplega.

Pa mas informacion y ayudo di Huurcommissie por tuma contacto via 582 9914.