Historiado Adolf ‘Dufi’ Kock ta haci donacion di ultimo bukinan historico na Biblioteca Nacional

ORANJESTAD - Escritor y historiador, Sr. Adolf (Dufi) Kock, a bishita Biblioteca Nacional recientemente pa entrega su ultimo dos publicacion, ‘Seccion historico di Aruba’. 

Esaki ta dedica na ‘Nos futuro generacion’, y ‘Mision di Marineronan Noruega’ dedica na Su Excelencia Gobernador, Sr. Juan Alfonso Boekhoudt.

Seccion historico di Aruba 

Den publicacion historico aki, Sr. Dufi Kock ta enfoka riba un variedad grandi di topico di historia di Aruba. E contenido ta ilustra cu hopi potret. (310 pagina y 136 topico)

Sr. Mauritsz de Kort, Su Excelencia Gobernador di Corsou, ta skirbi den prologo ”Cu respet y un curason colma di gratitud, mi ta presenta e obra historico, ‘Seccion historico di Aruba’. E obra aki ta un testimonio di e espirito y rikesa cultural di nos isla stima. Despues di un investigacion meticuloso y un naracion pasiona, e autor a establece un contribucion valioso pa preserva historia di Aruba – un regalo no solamente pa nos cu ta bibando e awor, sino tambe pa e generacionnan nos dilanti”.

A nomina Sr. Adolf ‘Dufi’ Kockcomo prome baluarte ‘Savanetero’ pa su bario di Savaneta, como historiador y escritor. Diseño grafico di portada ta di artista visual Elvis Tromp y Dufi Kock. E publicacion aki ta bay pa Coleccion Nacional na Deptamento Arubiana. Tambe e circulacion publico na O’stad y sucursal na San Nicolas. E publicacion aki ta danki na e contribucion y sosten exclusivo di MetaCorp. E buki ta obtenibel na libreria pa 75 florin.

Mision di Marineronan Noruega

E di dos buki “Mision di Marineronan Noruega” (27 pagina) ta un relato den cual ta enfoca riba e rol interesante cu e Norwegian Seamen’s Mission (Mision Noruega) na Vuylestekestraat 23, na San Nicolas a hunga durante cu e refineria di Lago tabata ricibi miles di barco Noruega den su waf, incluyendo e bayeneronan ( un barco disena pa mata bayena cu harpoen). Un luga unda e nabegantenen por a disfruta den nan oranan liber y alabes comunica cu nan sernan keri door di post. Un obra cu no solamente ta keda corda nos di nos pasado pero tambe e presente, e futuro y alabes influencia nos identidad como pueblo. E publicacion aki ta dedica na su excelencia Gobernador, Sr. Juan Alfonso Boekhoudt.

Adolf (Dufi) Kock, despues di a traha na LAGO pa 35 aña y na diferente hotel pa 5 aña, na 1997 a dicidi di bay cas y dedica su tempo liber na trabou comunitario y alabes na investigacion di historia di Aruba, di LAGO y tambe riba e di dos Guera mundial. Su meta semper ta, pa trata di laga documentacion bon y corecto pa nos futuro generacion.

Por haya mas informacion di e escritor via e siguiente linknan:

Historiado Adolf ‘Dufi’ Kock ta haci donacion di ultimo bukinan historico na Biblioteca Nacional.