Healthy Lifestyle Center a habri su portanan na MFA Savaneta

Minister di Turismo y Salud Publico Dangui Oduber tabata presente pa celebra inauguracion di nan di dos localidad, hunto cu empleadonan di HLC y publico di pariba di brug.

Healthy Lifestyle Center a inicia dia 23 di februari 2023 cu su localidad na e oficinanan di Ibisa na Oranjestad. E meta principal di HLC ta pa brinda pueblo e guia profesional di nutricion y movecion, specialmente esnan mas na riesgo pa haya complicacion di salud, door di hiba un bida no saludabel. E meta ta pa guia e participante pa adapta su bida pa uno mas saludabel.
HLC ta ofrece guia di nutricion y movecion di manera personalisa y adapta na bida di e cliente
specifico. E programa aki tin un duracion di 3 luna den cual e cliente ta haya su citanan tur siman cu un dietista cu ta siñ’e con pa yega na un bida mas saludabel.

HLC ta conta cu mas di 350 cliente activo cu hunto a baha un total di 433kg. Ademas HLC
ta ofrece otro programanan manera curso na scol, curso na compania, chekeo gratis regularmente na pueblo, ehercicio mensual na unda comunidad completo por
participa.

Un programa special cu HLC ta ofrece ta e programa yama “Improving Lives Together”.
Esaki tin un duracion di 3 luna den cual un total di 20 cliente ta participa. E programa aki ta ofrece guia di nutricion y movecion intensivo den un forma “community based”. Durante e periodo aki e clientenan ta ricbi, banda di consulta semanal na HLC cu un dietista, tambe un programa di ehercicio cual ta encera 3 biaha pa siman na un gym na unda nan ta ricibi guia profesional con pa haci movecion na un manera safe y accesibel.

E compromiso di HLC ta pa keda amplia su servicionan y bay den organisacionnan pa
asina guia tur esnan na pia di trabao. Esaki tambe ta rason pa habri un di dos localidad
pa asina keda accesibel pa tur persona aki na Aruba. HLC ta sinchronisa cu e vision di Ministerio di Salud Publico, pa enfoka riba prevencion, cual ta cuadra tambe cu ehecucion di e Plan Nacional Multisectoral contra NCDs 2020-2030 cu conhuntamente cu DVG y PAHO, a acorda na 2019.

Minister Oduber ta felicita e team profesional di HLC, Departamento di Salud Publico, Plataforma di Promocion di Salud y tur esnan cu ta aportando pa haci HLC un programa exitoso.
Ademas ta invita comunidad, specialmente esnan pariba di brug, pa acudi na e centro y busca informacion. Tuma e prome stap pa ricibi guia profesional y cambia bo estilo di bida pa uno mas saludabel.