Gobierno y tur departamento concerni ta sigui monitor situacion di tempo
ORANJESTAD - Diamars mainta gobierno a duna un update relaciona cu e situacion di tempo, pa asina tene e comunidad informa riba posibel yobida fuerte cu por afecta nos isla.
Comunicacion entre gobierno Crisis Management Office (CMO) y Departamento di Meteorologico Aruba (DMA) ta sigui monitor e situacion di Tormenta Tropical Melissa. Segun pronostico te na e momento aki, tempo lo keda instabil algun dia mas.
Prome Minister Mike Eman tabata den contacto estrecho durante fin di siman pa evalua riba e decision di yama un conferencia di prensa pa asina brinda un update di e formacion di mal tempo den region. Den careda di 11:00 AM a ricibi informacion cu e status a cambia pa un Tropical Storm cual a anticipa diabierna siman pasa.
Mirando cu e ta basta noord di nos isla, nos no ta premira un impacto directo, asina mes ta pidi e comunidad pa ta cauteloso riba efecto secundario cu nos lo por ricibi den e transcurso di e dianan aki.
A yega di sosode den pasado cu efectonan di un of otro tormenta den region a laga atras, a causa dañonan grandi y ta pa es motibo aki mes ta keda cauteloso y ta pidi e comunidad pa sigui monitoria cualkier cambio di tempo.
Ta consehabel pa tene cuenta cu cambio di biento y lama bruto cu ta efectonan cu e mal tempo por trece cu ne. Nos ta afortuna cu mayoria mal tempo lo keda pa noord di nos isla. Prome Minister a expresa di ta convivi cu nos isla rumannan y esnan den region, cu ta pasando den un mal tempo basta fuerte cu hopi awa, strena y lamper.
Ta haci un apelacion na e comunidad pa keda pendiente y alerta pa cualkier eventualidad.