Gobierno ta lansa "Dia Nacional pa Cuida Aruba" pa fortalece responsabilidad comparti den cuido di nos isla

E iniciativa lo culmina cu un gran accion nacional di limpiesa riba diasabra 25 di juli, den tur skina di Aruba.

A  haci e anuncio durante un rueda di prensa na Dam di Moko door di Prome Minister Mike Eman, acompaña pa Minister di Turismo, Transporte y Labor Wendrick Cicilia, Director di Serlimar Michel Henriquez, Director di CEDE Aruba Daniel Tecklenborg, representante di DOW y diferente partner cu ta forma parti di e iniciativa.  

Den su declaracion, Prome Minister Mike Eman a indica cu e accion nacional ta un siguiente paso den e esfuersonan cu Gobierno a bin haci durante mas cu un aña pa fortalece cuido di barrio y espacio publico. "E dia 25 di juli nos kier cu henter Aruba sali for di su cas, su bario, su empresa, su club of su organisacion pa hunto tuma responsabilidad di tene nos isla limpi." E Prome Minister a recorda cu Gobierno ya a introduci diferente iniciativa manera Baki den Bario, e Zona di Desperdicio permanente na Barcadera y cu pronto lo bin un segundo punto permanente pa comunidad, danki na colaboracion entre Gobierno y Serlimar.

Tambe a anuncia cu Ecotech lo contribui na e accion nacional door di acepta, sin costo, desperdicio cu lo entrega na e sitio permanente di Barcadera riba e dia di e accion nacional. E colaboracion aki ta un aporte importante pa facilita participacion di comunidad y sector comercial. E Prome Minister a enfatisa cu solamente cu e trabou diario di DOW, Serlimar, Bureau City Inspector y otro instancia no ta suficiente pa mantene Aruba limpi. "E accion aki ta pa demostra cu nos tur ta dispuesto pa carga un parti di e responsabilidad di cuida nos pais. Aruba ta nos tur. Si nos tur contribui, nos por preserva un isla dushi pa biba y tambe dushi pa bishita."

E ultimo simannan Gobierno tambe a reuni cu diferente stakeholder den e plataforma Common Good, apelando riba organisacionnan di bario, ONG's, fundacionnan y diferente grupo comunitario pa organisa accionnan pa nan mes riba 25 di juli.

Gobierno ta haci un yamada na tur ciudadano pa participa activamente riba Diasabra 25 di juli. Den diferente punto rond Aruba lo tin bakinan disponibel pa entrega desperdicio, facilitando famianan, clubnan y organisacionnan por forma parti di e gran accion nacional.

Cu e lema "P'ami. P'abo. Pa nos tur.", Gobierno ta invita henter Aruba pa uni forsa y haci di e Dia Nacional pa Cuida Aruba un expresion di orguyo, responsabilidad y amor pa nos isla.