Gobierno ta introduci bari di sushi nobo cu dobel capacidad den Oranjestad
ORANJESTAD - Minister di Asunto Economico, Comunicacion y Desaroyo Sostenibel, Geoffrey Wever, conhuntamente cu “Metabolic Foundation” lo introduci un serie di bari di sushi nobo, cu tin dobel capacidad (100 galon) pa reemplasa e barinan existente den centro di ciudad.
E barinan lo mehora limpiesa y promove sostenibilidad den cuadro di e revitalisacion den e centro di Oranjestad,
Metabolic Foundation ta un organisacion local dedica na produccion di varios producto di plastic cu nan ta colecta y recicla na Aruba mes. E proyecto aki ta forma parti di e esfuerso total pa revitalisa Oranjestad, cu limpiesa como un elemento integral y esencial.
Gobierno ta pone enfasis riba proyectonan sostenibel y subraya e importancia di e ambiente y creacion di un economia nobo basa riba e modelo circular. Tur e esfuersonan aki ta destina pa impulsa e economia local, demostrando un vision progresivo y sostenibel pa e futuro di Oranjestad.
Durante un bishita na e tayer di Metabolic Foundation, e mandatario a ricibi un splicacion detaya di e proceso di produccion di e bari di sushi. E bari nobo, diseña pa sostene un volumen mas grandi di desperdicio, tin como meta pa soluciona e deficiencianan di e barinan actual den centro di e ciudad, cu tin capacidad chikito y ta den condicion malo. Asina ta contribui na un ambiente mas limpi y organisa. E barinan nobo ta traha di plastic colecta y recicla na Aruba.
E instalacion di e barinan nobo ta un paso importante pa conscientisa e comunidad riba e importancia di reciclahe y maneho adecuado di desperdicio. Ademas, e ta refleha e compromiso di Gobierno di Aruba pa sostene organisacionnan local pa amplia nan capacidad pa sigui contribui na maneho di desperdicio riba nos isla.
E inversion di mas cu AWG. 60,000 den e proyecto aki ta beneficia Aruba den conscientisacion y reduccion di desperdicio.