Gobierno ta Introduci Ayudo Financiero pa Muchanan cu Mester di Cuido Intensivo

E sesion tabata parti di e esfuerso pa fortifica e sector social pa famianan vulnerabel na Aruba.

Bou di e revision di e sistema di siguridad social den cuadro di e Landspakket, Gobierno ta trahando riba un modelo mas humano, moderno y husto.
E ayudo financiero pa muchanan cu limitacion ta un paso clave pa brinda dignidad, stabilidad y sosten na famianan cu tin yiu cu mester di cuido intensivo.

E medida aki ta basa riba e realidad cu cuido intensivo ta crea situacionnan no comun pa un famia, cu merece reconocemento, sosten y oportunidad igual.

Na aña 2021, Parlamentarionan Melvin Wyatt-Ras y Mike Eman – awe Minister di Salubridad y Asuntonan Social y Minister President– a propone e introduccion di un ayudo financiero pa muchanan cu limitacion na Aruba. Esaki a forma e base legal pa e ayudo aki. E ley nobo ta crea seguridad y derechonan claro pa famianan cu ta depende di cuido continuo.

E ayudo financiero ta destina pa muchanan te cu 18 aña, inscribi den Registro Civil/Censo, cu limitacion fisico, mental, psicologico of di comportamento, cu tin mester di cuido intensivo.

E ayudo ta un sosten financiero pa e mayor/dunado di cuido y por uz’e pa cuido adicional, aparato di cuido, transporte of ahustacion na cas (rampa, gehandicapten wc, etc.).

Gobierno ta reafirma su compromiso pa sigui desaroya un sistema social mas fuerte, humano y inclusivo cu ta brinda sosten real na famianan cu tin yiu cu necesidad di cuido intensivo.