Gobierno ta intensifica cooperacion contra crimen digital durante bishita na High Tech Crime na Hulanda
ORANJESTAD - Como parti di su bishita oficial na Hulanda, Minister di Husticia, Integracion y Transporte Publico, mr. drs. Arthur Dowers a bishita e Hefe di Operacion di High-Tech Crime Unit di Korps Landelijke Politie Diensten, sr. Stan Duif.
E reunion a concentra riba combatimento di crimen cibernetico, desaroyo di politica pa intervencion trempan, y fortificacion di e plataforma di cooperacion internacional.
Crimen cibernetico ta un menasa creciente den e mundo moderno, cu ta evoluciona rapidamente y ta afecta tanto individuonan como institucionnan. Den region Caribense, nos ta mira un aumento di caso di fraude digital, phishing, robo di data personal y ataque riba infrastructura critico. E vulnerabilidad di islanan chikito manera Aruba ta subraya e necesidad pa fortalece nos defensa cibernetico y e cooperacion cu rednan internacional di siguridad digital.
Durante e reunion, Minister Dowers a enfatisa e urgencia pa adapta nos sistema di husticia na e realidad digital y a expresa su determinacion pa fortalece e cooperacion strategico entre Aruba y e autoridadnan di siguridad digital na Hulanda.
Minister Dowers a reafirma cu Aruba ta dispuesto pa tuma paso concreto pa preveni menasa digital, den colaboracion estrecho cu su partnernan regional y internacional, pa salvaguardia e siguridad y trankilidad di nos pueblo den un era cada bes mas conecta.
