Gobierno ta fortifica cooperacion cu organisacionnan di sector pa atende retonan den agricultura, cria di bestia y pesca

E reunion a enfoca riba un dialogo habri tocante locual agricultornan, criadornan di bestia y piscadornan ta experiencia den nan trabou diario, y cua pasonan concreto ta necesario pa sigui fortifica e sector. Durante e combersacion a trata, entre otro, disponibilidad y costo di awa, falta di tereno adecua pa agricultura, daño causa pa cachonan los, costo halto di energia, incertidumbre fiscal, uzo di pesticida y problemanan administrativo relaciona cu importacion di productonan y materialnan necesario.

“Pa por fortifica nos sector primario di forma duradero, nos mester compronde bon kico ta pasando den practica. P’esey ta importante pa nos no solamente formula maneho pa e sector, sino haci esaki hunto cu e personanan y organisacionnan cu ta forma parti di e sector. Door di identifica y monitorea e retonan hunto, nos por traha mas dirigi riba solucionnan cu realmente ta haci un diferencia,” segun Minister di Finansa, Asunto Economico y Sector Primario Geoffrey Wever.

Acceso na suficiente awa na un prijs accesibel ta keda uno di e retonan mas grandi pa agricultornan local. Actualmente, hunto cu Aruba Waste Water Solution (AWSS), DLVV y Departamento di Salud Publico (DVG), ta trahando riba un proyecto piloto pa guia awa recicla pa e dam di Santa Rosa, mientras DVG ta involucra den evaluacion di calidad di e awa.
Disponibilidad limita di tereno adecua pa agricultura tambe a haya atencion. E ministerio ta explorando posibilidad pa desaroya un parke agricola, cu no solamente tereno, sino tambe infrastructura y facilidadnan basico necesario pa facilita produccion local.
CPCA a trece dilanti e problema di cachonan los y e daño cu nan ta causa na cria di bestia. Gobierno lo evalua hunto cu esnan concerni cua medidanan ta posibel dentro di e cuadro legal.
Particularmente pa productornan cu ta depende di pomp, refrigeracion y sistemanan hidroponico, costo di energia tambe ta un reto. Gobierno lo inclui e tema aki den proximo consultanan cu WEB.
Durante e reunion, UFA a pidi claridad tocante e posicion fiscal di empresarionan den sector agricola. E minister a confirma cu e exoneracionnan fiscal existente pa partidonan activo den sector agricola lo keda vigente.

“E combersacionnan no por keda solamente na identifica problemanan. Pa cada reto importante nos mester determina ken lo encarga cu dje y ki ora e sector por spera un feedback. Solamente door di acerca gobierno y sector mas na otro, nos por construi un sector primario mas fuerte, profesional y prepara pa futuro,” segun Minister Geoffrey Wever.