Gobierno ta duna inicio oficial na fase 1 di revitalisacion di San Nicolas

E acto a tuma luga na presencia di Minister di Husticia, temporalmente responsabel cu Infrastructura, mr. drs. Arthur Dowers, y Minister di Finansa, ASunto Economico y Sector Primario mr. Geoffrey Wever.

Minister Dowers a enfatisa cu e renobacion di e stacion di bus ta mas cu simplemente un proyecto di construccion. San Nicolas merece inversion continuo, pa por duna un impulso economico anhela. E prome fase ta encera remodelacion di henter e area di stacion di bus, cu lo tin dos fase.

E prome parti lo dura cinco pa seis siman y ta inclui:

• Renoba y modernisa e stacion di bus y e area;
• Construccion di un Farmer’s Market na e parkeerplaats cu lo cay bao maneho di Santa Rosa;
• Instalacion di un speeltuin entre e edificio di SETAR y Post Aruba.

Minister Geoffrey Wever a splica cu e vision pa traha e vierbaansweg, restaura monumentonan y e reanimacion di turismo cultural,  ta forma parti di e plan di Gobernacion. “Nos ta traha pa hiba San Nicolas bek den su añanan di gloria.”

E renobacion di e stacion di bus ta parti di un plan amplio pa revitalisa e ciudad:

• Renobacion di caminda, cayanan y espacionan común;
• Promocion di desaroyo economico local;
  Impulso di turismo y comercio;
• Inclusion di tur ciudadano den e rikesa di nos Pais.

Gobierno tin e compromiso pa mehora e calidad di bida di e habitantenan di San Nicolas y ta traha cu firmesa pa crea un ciudad cu ta florece, ta sostenibel y cu ta comparti e rikesa economico.