Gobierno ta conmemora Dia Internacional di Perdida di Embaraso y Baby

Dia Internacional di Perdida di Embaraso y Baby ta un evento mundial di cuido di salud conmemora riba 15 di october tur aña pa conscientisa tocante perdida di Embaraso, Sindrome di Morto Repentino di Baby (Sudden Infant Death Syndrome -SIDS) y morto di baby, ku ta inclui perdida di embaraso, nacemento morto y fayecimento di yiu recien naci.

Riba e dia aki, comunidadnan mundial ta uni pa honra y conmemora tur e bidanan chikito cu a bay demasiado tempran. Dia Internacional di Perdida di Embaraso y Baby ta un momento pa mustra empatia, amor y solidaridad cu tur mayor cu a perde un yiu durante e embaraso of den su prome lunanan di bida. 

Pa hopi famia, e perdida di un yiu ta un dolor cu no por describi cu palabra. Ta un duele silencioso cu hopi biaha ta keda den scuridad, pero cu ta merece comprension y respet di nos comunidad. Gobierno a invita tur hende pa tuma un momento di refleccion, pa cende un bela y pa uni den e ola di luz mundial, un simbolo di amor, recuerdo y speransa. 

Durante di e anochi aki, Minister di Relacionnan den Reino, Enseñansa, Hubentud, Innovacion y Deporte mr. Gerlien Croes, y Prome Minister mr. Mike Eman a hiba palabra a expresa forsa na tur esnan cu a pasa den e trauma aki di perde un baby recien naci of cu nan yiu a nace sin bida.  

E dia aki ta sirbi pa duna forsa na esnan cu a perde un yiu, pa mustra cu nan no ta so, y cu tur por contribui na un ambiente di comprension y sosten. Cada bida, no importa con cortico, ta laga atras un marca profundo den nos curason. 

Riba e dia aki, mester por habri e combersacion riba e tema aki, duna oido na esnan cu a pasa den e trauma aki, y crea un comunidad cu ta basa riba amor, respet y speransa. 

Na final di e evento solemn, e cende luz biña y blauw riba e fachada di Bestuurskantoor pa conmemora e babynan cu no a haya e oportunidad den bida pero tambe pa crea consientisacion riba e importancia pa extende sosten na esnan cu a perde nan baby.