Gobierno di Aruba ta anuncia un destaho publico pa scoge un arkitecto pa renoba Wilhelminastraat y su vecindario

Minister di Finansa, Asuntonan Economico y Sector Primario Geoffrey Wever, acompaña pa Prome Minister Mike Eman y Minister di Infrastructura René Herdé, a haci e anuncio oficial.

E proyecto ta forma parti di e esfuerso continuo di Gobierno di Aruba pa revitalisa e centro di Oranjestad, stimula comercio y stimula cu Oranjestad ta bira un centro tin vivienda, gastronomia, oficina y retail.

E meta di e destaho ta pa diferente arkitecto entrega nan plan visual pa e area y despues un comision consistiendo di Gobierno di Aruba y sector priva lo scoge e plan mas bunita y mas integral pa e arkitecto cu gana e proyecto por prepara e diseño final, bestek y demas documentonan cu ta necesario pa por ehecuta e trabou di construccion.

E iniciativa ta abarca e area di Wilhelminastraat number 49/62 te cu e crusada Wilhelminastraat/Kazernestraat (excluyendo Plaza Daniel Leo), y tambe e zona di Klipstraat/Oranjestraat, incluyendo Rifstraat y Schoolstraat.

E diseño cu lo sali for di e encargo aki lo sirbi como base pa implementacion di un plan di embeyecemento structural y estetico, cu tin como meta pa haci Oranjestad mas atractivo pa comerciante, bishitante y ciudadano.

“Nos ta sigui pone enfoke riba un Oranjestad moderno, vibrante y sostenibel. E destaho publico aki ta un paso concreto den e proceso di renobacion urbano cu nos a compromete nos mes pa realiza,” Minister Wever a declara.

• Termino di ehecucion: 80 dia di trabou efectivo despues di emision di e carta di asignacion.
• Disponibilidad di descripcion di e trabou (werkomschrijving): desde 17 october 2025, na Dienst Openbare Werken (DOW), na un costo di Afl. 250,00. Mester haci e pago na e cashera di DOW.
• Reunion di informacion: 23 october 2025, ora 10.00 di mainta, na DOW.
• Nota di Inlichtingen: 30 october 2025.
• Destaho publico: 7 di november 2025, ora 11.00 di mainta, den oficina di e Director di DOW.

Rekisto pa inscripcion

E companianan interesa mester presenta:

• Prueba di inscripcion na Camara di Comercio di Aruba (no mas bieu cu 6 luna).
• Copia di identificacion di e directornan di e compania.
• Copia di declaracion di Departamento di Impuesto (DIMP).
• Tur otro documento indica den e descripcion di trabou.

Mester haci e inscripcion uzando e formulario oficial certifica (gewaarmerkt) cu ta inclui den e descripcion di trabou (bestek).