Gobierno cu reunion importante riba desaroyo di ex edificio di DOW
ORANJESTAD – Dialuna 5 di februari 2024, Minister di Turismo y Salud Publico sr. Dangui Oduber conhuntamente cu Director di Aruba Ports Authority (APA) sr. Marc Figaroa, CEO di Aruba Tourism Authority (ATA) sra. Ronella Croes, representante di DOW y Monumenten Bureau Aruba, sr. Raul Gei, a bini hunto pa un “kick off meeting” pa e proyecto di ex-DOW cu lo inicia pronto.
E proyecto pa e edificio di ex-DOW ta un proyecto di renobacion. E edificio aki tin 16 aña bandona, y ta un bista desagradabel pa nos bishitantenan cu ta baha for di crucero net su dilanti. Pronto, Aruba lo mira desaroyo di e proyecto di Port City y esaki tin como plan tambe cu e oficinanan existente di APA (dilanti di Yrausquin & Sons) lo mester muda bay den e edificio renoba di ex-DOW. Mirando e tamaño di e edificio aki, lo bay comparti esaki cu ATA. APA su oficinanan lo ocupa e piso 2, mientras Aruba Tourism Authority (ATA) lo huur piso 1 y converti esaki den un Visitor Information Center (VIC) pa brinda informacion na nos turistanan.
E VIC lo brinda tur informacion di kiko tur tin di haci na Aruba, kiko ta tur e actividadnan, nos miho beachnan, lista di restaurant y kiko tur nos tin pa ofrece, nightlife, transporte y mucho mas. E lo sirbi como un "one stop shop" pa guia e turista asina cu e baha di e barco crucero.
Gobierno su vision y maneho den turismo ta basa riba inversion continuo den producto Aruba pa por ofrece un producto di calidad superior. Esaki ta importante pa yuda mantene nos posicion den e mercado sumamente competitivo. Finalmente Ministerio di Turismo ta gradici APA, ATA, DOW y Monumenten Bureau Aruba pa hunto realisa un proyecto cu nos tur por ta orguyoso di dje.