Gobierno a firma MoU cu Oranjestad Investors Group

Recientemente, Minister  Herdé acompaña pa Minister Wever, hunto cu algun inversionista den Oranjestad, a haci un recorido den Caya Grandi relaciona cu inversionnan cuantioso cu inversionistanan ta haciendo y tin planea pa haci den varios edificio. Tin varios proyecto priva den ehecucion caba den Caya Grandi y tin varios mas na caminda. Ademas a papia riba diferente inversion pero tambe e necesidad cu tin mester manera mehoracion di infrastructura, mantencion di mata, y limpiesa etc. A recorido a tuma luga den e caya principal, den area di Djiespie’s Place y Wilhelminastraat.

Cu e plannan di e inversionistanan den mente, awo Gobierno por alinea nan trabaonan pa cu Caya Grandi cu esaki pa crea un miho sinergia y pa tur cos cana mas eficiente posibel. Recien Gobierno a aloca un miyion florin adicional pa renobacion di Wilhelminastraat, Klipstraat y esey ta netamente locual a dialoga cu e inversionistanan durante di e recorido.

Gobierno ta sostene inversionnan asina den y rond di centro di ciudad y pesey ta importante pa mantene e relacion cu e inversionistanan aki. E modelo den cual gobierno ta traha activamente cu sector priva, ta esencial pa logra exito den tempo corto compara cu si cada un haci nan parti riba nan mes.  Inversionistanan por drecha edificionan pero gobierno tambe tin un rol importante pa cu mehoracion di e demas aspectonan manera miho iluminacion, mas luga di parkeo, mantencion di e areanan limpi, mas mata, percura pa siguridad, otorgamento di permisonan etc.

Durante su discurso, Prome Minister Eman a indica cu "ta importante pa ta den combersacion y cu gobierno y inversionistanan a haya otro riba e puntonan mas elemental necesario pa e revitalisacion di Oranjestad. Nos capital yama Oranjestad locual ta indica e conexion entre Aruba y Reino Hulandes".

Cu e acuerdo aki, e vision pa un Oranjestad revitalisa ta haya e impulso necesario pa e trabaonan tuma luga di forma acelera.