Gobernador ta ricibi e prome ehemplar di e buki pa mucha pa e edicion 34 di Kinderboekenweek
ORANJESTAD - Diabierna dia 9 di october Gobernador di Aruba, Su Excelencia Alfonso Boekhoudt, a ricibi señora Astrid Britten, directora Biblioteca Nacional Aruba, pa un audiencia.
Durante e bishita aki Gobernador a haya e prome ehemplar di e buki pa mucha di Kinderboekenweek (Festival di buki di mucha), cu lo keda regala na nos muchanan den cuadro di e festival di buki edicion 34.
E aña aki e regalo di e Kinderboekenweek ta un buki di prenchi cu e titulo “Rashi Curashi ta haya curashi!”, skirbi door di e escritor Arubiano Daylan Krozendijk, docente di drama na Instituto Pedagogico Arubano (IPA) y ilustra door di ilustrado Hulandes Petra Heezen.
Sr. Krozendijk a compaña Sra. Britten durante e audiencia.
E tema actual di e festival di buki pa mucha ta “Spot aan!”, traduci na Papiamento como “Luz, Camara, Accion!”.
E apertura oficial di e festival di buki pa mucha, edicion 34 ta tuma luga diabierna 30 di october 2026 na Biblioteca Nacional situa na George Madurostraat.
Potret: © Kabinet Gouverneur Aruba
