Gateway 2030 avansando segun plan
ORANJESTAD – Dia 28 di februari 2024, Minister di Turismo y Salud Publico Sr. Dangui Oduber, a ricibi un recorido na Aeropuerto Reina Beatrix for di CEO di AAA sr. Joost Meijs, pa haya update di e proyecto Gateway 2030, Fase 1A.
AAA a duna un splicacion amplio di e planificacion di cada fase cu su respectivo diseño di e proyecto cu ta avansando segun plan.
Gateway 2030 ta un proyecto di 143 miyon dollar Mericano cu lo genera entre 200 y 300 cupo di trabao sea directo of indirecto cu AAA. Unabes cu termina cu e fase aki, biaheronan pa Merca lo check-in un biaha so y lo no mester bolbe recoge maleta prome cu subi avion.
Ta importante pa subraya cu ta contratistanan local ta encarga cu e trabaonan, mientras mayoria material di construccion ta cumpra na Aruba mes. Gateway 2030 lo comberti Aeropuerto Reina Beatrix den un di e aeropuertonan mas moderno den Caribe y Latino America. E fluho di US Departures, for di momento cu e biahero check-in te ora cu e subi avion lo ta mas eficiente y hopi mas lihe.
Pronto lo drenta Fase1B y despues Fase 2 & 3 di e proyecto Gateway 2030. Mester subraya cu e proyecto Gateway 2030 no ta uno facil, y tin varios reto mirando cu aeropuerto mester keda operacional na tur momento.
Minister Oduber tin tur e confiansa den ful e POM team y AAA cu ta trahando duro pa por entrega Aruba un aeropuerto moderno y innovativo.