Extension Consulta Publico pa Derecho di Naturalesa

E sesionnan aki lo termina dia 21 di april 2024. E esfuersonan aki ta refleha un paso grandi den e reconocemento y proteccion di e derecho fundamental di naturalesa pa existi y prospera.

Varios sesion di consulta a tuma luga den e dos siman cu a transcuri y a conta cu participacion di publico en general, gremio comercial, abogado y hues, conhuntamente cu Directie Natuur en Milieu. Durante e sesionnan a discuti cada articulo di e proposicion di ley den tur detaye, colectando e punto di bista y sugerencianan di participantenan. A enfoca riba dialogo habri y ricibi feedback constructivo. A pone enfasis ariba e importancia di inclui un grupo diverso cu interes den e proceso di desaroyo di e ley, sigurando cu e legislacion final ta representativo di e deseo y necesidad di e comunidad di Aruba.

E proceso di consulta ta continua riba plataforma digital. Esnan interesa por lesa e propuesto di ley y comparti nan opinion y sugerencianan pa medio di e formulario online disponibel riba
www.publico.aw/consulta/. E feedback di e comunidad lo yuda forma e base pa un ley mas fuerte y efectivo.

Pa fomenta un nivel mas amplio di participacion y transparencia, a extende e fecha pa
entrega di feedback te cu dia 21 di april, dunando comunidad mas oportunidad pa aporta na e desaroyo legislativo. E fecha di 21 di april ta un dia prome cu e celebracion di Dia di Mama Tera, y ta marca un aña desde cu a entrega e iniciativa di ley aki.

E iniciativa aki ta mas cu legislacion; e ta un declaracion di e compromiso colectivo pa respeta,
proteha, y trece naturalesa y desaroyo den balans pa nos Pais.