Exposicion di potret ‘Framing Social Problems and Solutions’ na Biblioteca Nacional Aruba
ORANJESTAD – Department of Social Work and Development in the Faculty of Arts and Science (Departamento di Trabou Social y Desaroyo na Facultad di Arte y Ciencia) na Universidad di Aruba ta anfitrion di un exposicion di potret ‘Framing Social Problems and Solutions, .’
E evento a habri oficialmente na Biblioteca Nacional Aruba dialuna 26 di mei 2025. E actividad di studiante aki ta parti di e curso di Latin America y Caribbean Social Issues den e programa di Bachelor pa Trabou Social y Desaroyo na Universidad di Aruba. Den e curso aki e cursistanan ta cera conoci cu problemanan social na Aruba y ta aplica teorianan sociologico pa splica nan causanan y pa haya solucionnan sostenibel. Studiantenan a haya entrenamento den fotografia y nan mester a saca potret di problema social na Aruba, Caribe, of Latino America, y un potret di e solucion pa e problema. Ta exhibi e potretnan aki den e exposicion.
Obhetivonan di e Exsposicion di Potret ‘Framing Social Problems and Solutions’:
- Studiantenan ta uza teorianan sociologico pa splica problemanan social y solucionnan na Aruba, Latino America, y e resto di e islanan den Caribe.
- Studiantenan ta uza fotografia pa participa den accion social y promove solucionnan pa problemanan social y cambio.
- Studiantenan ta demostra un compromiso cu analisis di problema social for di multiple perspectiva teorico sociologico.
Exposicion
E exposicion lo ta habri pa publico te dia 18 di juni 2025 na Biblioteca Nacional Aruba. Den colaboracion cu expertonan, studiantenan lo facilita un combersacion publico tocante ‘Solucionnan Innovativo pa Pobresa na Aruba, Latino America, y Caribe’ riba diahuebs, 12 di juni 2025 pa 7:00 di anochi.
