Expansion di RECIP-3 ta un paso importante pa siguridad energetico di Aruba

Tinalisacion di expansion di e planta ta un paso importante pa fortalece siguridad y confiabilidad di suministro di energia na Aruba. 

Hunto cu directiva di WEB Aruba y representante di Wärtsilä Finland Oy, e Minister encarga cu Energia, mr. drs. Arthur Dowers, tabata un di esnan cu a primi e boton di start cu oficialmente a pone e dos motornan RECIP nobo den operacion.

Cu entrada den operacion di e dos motornan, capacidad di produccion di energia via RECIP ta aumenta di 194 MW pa 230 MW, brindando Aruba mas capacidad firme pa responde na e demanda creciente di energia.

Durante su discurso, Minister Dowers a expresa, na nomber di Gobierno di Aruba, agradecimento na Wärtsilä pa e cooperacion cu durante añanan a mantene cu WEB Aruba. El a reconoce tambe e directiva, empleadonan, ingenieronan y tur profesional cu a contribui na realisacion di un proyecto tecnico y logisticamente compleho.

Ora comunidad mira e instalacion final, no semper ta visibel tur e trabou cu tin tras di dje. Transportacion di e ekiponan grandi pa Aruba, instalacion, integracion tecnico y cumplimento cu diferente fecha limite a exigi un esfuerso considerabel di tur esnan involvi. Apesar di e complehidad, a completa e Proyecto un siman prome cu e fecha planifica.

Mas capacidad pa un Aruba cu ta sigui crece

E expansion ta den contexto di e crecemento cu Aruba ta experimentando y e presion adicional cu esaki ta pone riba suministro di energia.

Aumento den actividad economico, turismo y consumo, combina cu periodonan di calor intenso, ta significa cu demanda di energia ta sigui presenta un reto. P'esey, Aruba mester tin suficiente capacidad y, mas importante ainda, planifica na tempo pa evita cu crecemento supera e capacidad disponibel.

“Nos a duna un paso importante pa garantisa siguridad di energia den nos pais,” Minister Dowers a enfatisa.

El a indica cu e responsabilidad di Gobierno ta pa crea e direccion, supervisa y vigila e maneho general, mientras cu e profesionalnan y experticio tecnico dentro di WEB ta carga e responsabilidad importante di ehecucion. 

Fundeshi pa siguiente paso den energia

Expansion di RECIP-3 ta brinda no solamente capacidad adicional, sino tambe un fundeshi mas fuerte pa e siguiente fase di maneho energetico di Aruba.

Cu e dos motornan nobo operacional, WEB ta den un posicion mas fuerte pa garantisa suministro mientras cu Aruba ta sigui prepara proyectonan relaciona cu energia renobabel y almacenahe, incluyendo mayor participacion di energia solar y di biento den e mix energetico.