Expansion di Parke: Ta forma parti di proyecto di embeyecimento y reforestacion di Oranjestad
ORANJESTAD - Na e skina di Adrian Lacle Boulevard, actualmente ta tumando luga un proyecto importante di expansion y embeyecimento di e parke existente, como parti di un plan mas amplio di reforestacion y revitalisacion di centro di ciudad.
Premier Mike Eman a indica, e expansion aki ta sirbi no solamente como mehoracion fisico di espacio publico, pero tambe como un luga di memoria pa esnan cu a perde nan bida durante Segunda Guera Mundial. E parke renoba lo combina historia, naturalesa y comunidad den un solo espacio.
Un aspecto special di e proyecto ta cu su preparacion ta den conmemoracion di e fecha di 18 di maart, dia cu Aruba lo celebra 40 aña di Status Aparte, y cu ta coincidi cu presencia di Rey na Aruba. E meta ta pa e parke ta cla pa e fecha aki.
Mas cu 100 mucha lo participa den e proyecto, plantando casi dos shen mata riba e area di expansion. E iniciativa aki ta forma parti di un programa di reforestacion nacional, caminda hobennan lo sigui participa activamente, incluso hunto cu Rey, den plantacion di mata como simbolo di futuro y sostenibilidad.
E proyecto, ehecuta door di Dienst Openbare Werken (DOW), cu ta desaroyando e obra internamente (in-house). Esaki ta permiti un maneho mas directo y eficiente di recurso y planificacion. A expresa satisfaccion cu e equipo di DOW, cu durante añanan a fortalece y desaroya, actualmente ta demostra un nivel solido di profesionalismo y compromiso.
E meta ta pa e parke renoba no solamente pa aporta na beyesa di e area, pero tambe contribui na e vision mas amplio di revitalisacion di centro di Oranjestad, creando un espacio berde, significativo y sostenibel pa comunidad.
Cu e fecha di 18 di maart acercando, e proyecto aki ta bira un simbolo di colaboracion entre gobierno, hubentud y comunidad, y un refleho di compromiso continuo pa cuida y embeyece Aruba pa generacionnan cu ta bin.