Expansion di Landspakket ta yuda avansa e maneho economico di Aruba

Ta importante pa locual Aruba a acorda, yuda avansa e implementacion di e vision y maneho economico di Aruba.

Ministerio di Asunto Economico, Comunicacion y Desaroyo Sostenibel, a traha un nota pa Hulanda indicando e vision economico, e areanan y proyectonan di e maneho economico actual di su Ministerio.

E impacto cu ta desea di logra cu e ‘partnership’ aki, cu a keda aproba den conseho
di minister di Aruba, ta pa stimula un desaroyo economico inclusivo y sostenibel.
Abase di e nota aki diferente combersacion a tuma luga entre Aruba y Hulanda unda cu a cera un acuerdo di asistencia tecnico y/of ayudo financiero riba varios area.

E areanan cu lo enfoca riba dje:

1. Haci e clima empresarial mas accesibel y atractivo pa empresarionan local como tambe inversionista; 
2. Mehora comercio den region;
3. Crea un ambiente laboral y di vivienda pa Oranjestad y San Nicolas;
4. Seguridad di alimento (stimula agricultura comercial);
5. Un maneho economico basa riba datos y cu ta considera e capacidad di e isla.

Pa cu esaki, lo traha concretamente cu Hulanda riba aspectonan manera:

• Optimalisa e procesonan di permiso y di suministro di informacion; 
• Mehoracion di proteccion di consumidor; 
• Mehora acceso na capital pa inversionista; Mehora comercio entre islanan ABC y otro mercadonan manera Colombia y Surinam; 
• Plan di desaroyo economico pa centro di Oranjestad y San Nicolas; 
• Maneho di industria creativo “Orange Economy”; 
• Sonde cual ta e tipo di ‘greenhouses’ mas ideal, cultivonan mas prometedor y sondeo di metodonan di cultivo pa Aruba.

Minister di Asunto Economico, Comunicacion y Desaroyo Sostenibel Geoffrey Wever ta satisfecho cu e colaboracion cu Hulanda den cuadro di e Landspakket. Banda di e ayudo ricibi for di Hulanda pa avansa areanan di maneho economico, e Landspakket ta percura tambe pa tin un structura di continuidad cu ta esencial pa logra cambionan pa progreso sostenibel di un pais.