Ex edificio di Ministerio Publico lo bira apartamento pa studiante
ORANJESTAD - Diaranson 28 di februari 2024, Gobierno di Aruba, oficialmente a inicia e proceso pa transforma e ex-edificio di Ministerio Publico (OM) na Oranjestad den un compleho di apartamento pa studiante, como parti di diferente iniciativa pa revitalisa centro di Oranjestad.
Parti di e vision di Gobierno ta pa mas hende cuminsa biba den centro di Oranjestad y pa renoba edificionan bandona, specialmente destina pa studiante.
Hunto cu Prome Minister Evelyn Wever-Croes, encarga cu DIP, cu ta maneha e propiedadnan di Pais Aruba, Minister di Asunto Economico Geoffrey Wever a drenta den combersacion cu FCCA, cu a mustra interes pa cumpra e propiedad y comberti esaki den un "studentenflat" - compleho di apartamento pa studiante.
Pa cumpli cu reglanan stipula pa hurisprudencia cu ta conta pa Gobierno, mester duna otro interesadonan tambe un oportunidad di obhecion contra e decision aki prome cu por drenta den un acuerdo definitivo cu FCCA, pa cual motibo a publica e intencion di Gobierno dia 27 di februari ultimo.
Si studiantenan biba den centro di Oranjestad, nan lo por cana bay Universidad di
Aruba y lo trece ful un dinamica nobo pa centro di Oranjestad.
E colaboracion entre Gobierno y sector priva ta destaca como un ehempel di con
planificacion urbano y desaroyo sostenibel por traha hunto pa beneficio di e comunidad, y ta fundamental pa e exito di e proyecto aki, combinando recursonan y experiencia pa alcansa un meta comun.
