Evento ‘Inspirando Aña Academico’ na IPA
ORANJESTAD — Directiva di Instituto Pedagogico Arubano (IPA) a organisa e exitoso evento “Inspirando Aña Academico 2026-2027” den Sala Madonna / Cafe Nita na IPA, unda cu a enfoca riba e tema central: “Rediscovering human capacities in a technological era”.
E directiva, docentenan, studiantenan y famianan a celebra inicio di e aña academico nobo y e logronan di e studiantenan.
Durante e programa, Minister di Educacion, Sra. mr. Gerlien Croes, a dirigi palabranan di inspiracion y animo na e futuro educadornan. E mandatario a resalta e importancia di reconecta cu e capacidadnan humano manera empatia, pensamento critico y conexion personal den un era caminda tecnologia ta hunga un rol cada bes mas dominante. E minister a enfatisa cu, maske tecnologia ta evoluciona, e impacto y e curason di un docente den e klas ta keda iremplasabel.
Un di e momentonan mas destaca y festivo di e anochi tabata e entrega oficial di e certificadonan di propedeuse na 13 studiante. Esaki ta marca un paso importante den nan carera academico, demostrando nan dedicacion y esfuerso pa bira e profesionalnan di enseñansa cu Aruba tin mester.
Minister di Educacion ta expresa su mas sincero gratitud na IPA pa e invitacion y ta desea tur cos bon y apoyo continuo na e instituto y na e studiantenan. Alabes el a felicita e 13 studiantenan cu a ricibi nan certificado di propedeuse y ta desea e comunidad academico completo un aña escolar 2026-2027 yen di exito, crecemento y inspiracion.