Estudio di FINTECH pa Aruba ta cla
ORANJESTAD – Recientemente, Minister di Finansa, Asunto Economico y Sector Primario, Geoffrey Wever, a ricibi e estudio final riba e riesgonan, obstaculonan y oportunidadnan di e sector di FINTECH pa Aruba y evaluacion di e impacto di “Blockchain Technology” y “Crypto Currency”.
E siguiente pasonan ta e presentacion oficial di e estudio na stakeholders.
Pa pusha e desaroyo di FINTECH na Aruba, hunto cu Hulanda via e Landspakket lo traha riba e strategia di implementacion di e estudio di FINTECH pa Aruba realisa pa “United Nations Economic Commission for Latin America and the Caribbean” (UN ECLAC).
Meta di e reunion aki tawata pa haya un bista realistico di e posicion actual di Aruba den e sector FINTECH pa asina tin mas conocimento di e impacto economico di technologianan innovativo y solucionnan digital nobo den e mundo comercial impacta pa cambio y desaroyo continuo. Esaki ta un proyecto cu a inicia mas cu un aña pasa. Cu entrega oficial di e resultado na minister Wever, UN ECLAC lo duna un presentacion oficial na tur partners cu a contribui na haci e estudio un exito.
Minister Wever ta gradici UN-ECLAC pa e estudio realisa y tambe Departamento di Asuntonan Economico, Comercio E industria (DAECI) cu ta guia e proceso di e estudio relevante pa desaroyo economico di Aruba. Maneho economico pa crea sectornan nobo ta tuma su tempo. Awor cu e estudio ta finalisa, e siguiente paso lo ta traha e strategia di implementacion via Landspakket y ehecuta esaki pa asina na un manera concreto pusha e diversificacion di Aruba su economia.