Entrega di bo necesidad di personal (Manpower Planning) 2026

Desde aña 2023 a introduci un metodo nobo cu ta dinamico, flexibel y transparente pa colecta y publica e Manpower Planning (necesidad di personal) a corto y a largo plaso riba e mercado laboral y ta pidi bo cooperacion den esaki. 

E necesidad di personal (Manpower Planning) tin su base legal den e Ordenansa Laboral 2013 (Arbeidsverordening 2013, AB 2013 no.14) cual ta vigente desde 1 di april 2013. Un dunado di trabou tin e obligacion, basa riba articulo 30 punto 1 di e Ordenansa, pa somete un Registro di Personal riba peticion di e Director di e Departamento di Labor & Investigacion (Directie Arbeid & Onderzoek, DAO). 

Pa entrega di e necesidad di personal (Manpower Planning) por haci uzo di e portal di e database Laboral di DAO.

Via e portal aki por:

• Entrega e Registro di Personal y e Manpower Planning,
• Mira e informacion directo cu ta registra na DAO.
• Entrega e Registro di Personal desde comienso di aña 2026. Esaki ta encera informacion di personal di bo compania te cu 31 december 2025.
• Entrega e Manpower Planning informacion entrante 5 december 2025. Den e formulario cu mester yena riba e portal, mester indica e necesidad di personal pa e aña venidero y tambe riba e mesun formulario ta indica e necesidad di personal en conexion cu proyectonan specifico pa e aña venidero.

DAO ta informa cu por sigui entrega necesidadnan nobo, cambionan of adicionnan riba e Manpower Planning (e necesidad di personal) indicacion di bo compania durante e aña 2026 via e portal di Labor of si bo no tin acceso riba e portal ainda, bo por entreg’e uzando un Excel sheet y manda esaki via email: dao.labora@aruba.gov.aw. Desde 5 di december 2026, por download e Excel sheet for di e website www.daoaruba.com of pidi esaki via email riba aanvraagpr@gmail.com y DAO lo mand’e pa bo via email.

DAO tin varios compania cu ya tin nan acceso riba portal di e database LABORA. Si bo ta desea di ricibi bo login informacion pa subi e portal, por manda un email pa sr. Simon Brete (simon.brete@aruba.gov.aw) of por yama na 523-7718.

Pa companianan cu ta haci uzo di un intermediario (p.e. accountings- of adviesbureau) DAO kier recorda cu cumplimento di nos leynan laboral ta un obligacion di e dunado di trabou y no di e intermediario.

Si tin pregunta, por tuma contacto cu sr. Simon Brete na number di telefon 523-7718 of via email simon.brete@aruba.gov.aw of cu sra. Louisetty Croes na number di telefon 523-7722 of via email louisetty.croes@aruba.gov.aw.