Enseñansa pa Empleo awo tambe na San Nicolas

Enseñansa a Empleo na San Nicolas no ta posibel sin e determinacion di Director Mathilda y juffrouw Helder, cu desde inicio a traha duro pa realisa esaki pa San Nicolas. A comparti e vision di Enseñansa pa Empleo cu EPB San Nicolas, y hunto cu varios docente di ofishi di E.P.B. San Nicolas, manera meneer de Mey, meneer vd Biezen y meneer Werleman a diseña e cursonan pa e sector tecnico. Enseñansa pa Empleo awo ta parti di e famia di E.P.B. San Nicolas.

E cursonan di Enseñansa pa Empleo San Nicolas ta diseña pa esnan cu tin curashi, gusta trabao di man y ta dispuesto pa siña e parti basico di Welder, Electra of Handyman. Enseñansa pa Empleo ta pa personanan cu kier sea amplia nan conocemento practico pero tambe pa esnan cu kier crea un fundeshi solido pa cu nan profesion.

Tin 3 curso cu ta cuminsa dia 10 di september 2024 y cada curso tin luga pa 10 participante cu ta motiva y interesa. Cupo ta limita pa asina garantisa siguridad durante di e cursonan, mirando cu ta traha cu ekiponan semi-profesional y industrial. Ademas ta traha cu diferente material pa e curso di Electricien y Welding. 

E 3 curso cu lo cuminsa ta:

• Electricien Basico
• Welderdo A
• Handyman Nivel 1

E cursonan ta riba diamars y diaranson anochi di 6:30-9:30 y tin un duracion di 13 siman. 
Tur e 3 cursonan aki lo tuma lugar den e edificio di EPB San Nicolas, situa na Caya Jose Geerman 77. Pa participa na e cursonan aki di Enseñansa pa Empleo, mester registra na https://www.epearuba.com/epe-san-nicolas/

Unabes completa e registracion, un empleado di Enseñansa pa Empleo lo tuma contacto cu e participante cu instruccion di pago. Ora completa e pago y manda e comprobante di pago pa Enseñansa pa Empleo, e participante ta formalmente registra y ta garantisa participacion na e curso di su preferencia.

E cursonan aki ta posibel danki na cooperacion di EPB San Nicolas, WEB Aruba NV, N.V. Elmar, RDA N.V. y Utilities N.V.