En conexion cu e celebracion di Dia di Independencia di Colombia a tene e 'Serenata Vallenata' na Biblioteca Nacional Aruba

Na comienso di e evento Minister di Cultura Xiomara Maduro a hiba palabra den cual ela mustra riba e lasonan fuerte di hermandad  entre Aruba y ColombiaA acentua cu ta lasonan familiar, ya cu un 10% di nos poblacion ta naci na Colombia. Pa locual ta trata musica,  a indica cu e musica Vallenato ta hopi gusta pa Arubianonan tambe y tin varios Arubiano cu ta skirbi y compone cantica Vallenato exitosamente.

E anochi a sigui cu un bunita baile bou coreografia di John Freddy Montoya di Departamento di Cultura di Aruba. Sigui pa un momento den cual e Fundacion Petronio Alvarez Internacional hunto cu sra. Glenda Zavala Maduro, cu ta motor tras di e intercambio cultural musical aki entre Aruba y Colombia, a duna reconocemento na varios persona cu na Aruba ta percura pa e musica Vallenato resona. 

Despues a sigui un intercambio cultural cu un bunita presentacion di e acordeonera di La Guajira sra. Indira Fernández, kende hunto cu algun musico di Aruba y Colombia a sa di deleita esnan presente cu musica di e folklore Colombiano.