Empleadonan di DWH a huramenta como BOA
ORANJESTAD, Aruba – 29 september 2025: Cinco empleado di afdeling Dienst Warenkeuring y Hygiëne (DWH) di Departamento di Salud Publico recientemente a logra un gran paso den nan carera como ambtenaar.
Nan a sigui cu dedicacion e opleiding di Bijzonder Opsporingsambtenaar (BOA) durante e periodo di october 2021 te mei 2022. Na fin di mei 2022, tur cinco a termina e curso cu exito y a demostra cu nan ta cla pa cumpli cu e responsabilidadnan di nan funcion.
Despues di un proceso di evaluacion, riba 22 augustus 2025 a firma e Landsbesluit oficial pa autorisa nan nombramento. E momento oficial a tuma lugar riba 25 september 2025, ora cu e cinco empleadonan a huramenta dilanti di Minister di Justicia Arthur Dowers, reafirmando asina nan compromiso pa sirbi y proteha e comunidad di Aruba den ramo di salud.
Como Bijzonder Opsporingsambtenaar, e tarea principal di nan ta pa garantisa siguridad y mantene un bon calidad di bida den comunidad door di detecta y aplica ley. E BOA tin e autoridad pa detecta violacion di ley, duna advertencia of prepara un proces-verbaal pa posibel boet.
Departamento di Salud Publico y su seccion Warenkeuring y Hygiëne ta orguyoso di e esfuerso y dedicacion cu e empleadonan a mustra. Nan logro ta un paso importante pa fortalece e control y proteccion di salud publico di Aruba.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw.