Embahadornan y Consul di Belgica a reuni cu Prome Minister
ORANJESTAD -- Diabierna 15 di maart 2024, Prome Minister Evelyn Wever-Croes a reuni cu Embahadora di Belgica na Hulanda, sra. Anick Van Calster, Embahador di Belgica na Colombia sr. Bert Schoofs y cu Consul Honorario di CAS (Corsou, Aruba y Sint Maarten) y BES (Boneiro, Sint Eustatius y Saba) sr. Jan van Belleghem.
E embahadornan ta na Aruba pa topa cu e comunidad di Belgica residencia na Aruba cu ta aproximadamente 200 persona, pero e bishita ta principalmente pa estrecha y
mehora aun mas, e lasonan entre Belgica y Aruba.
Actualmente Aruba tin un laso fuerte cu Belgica pa motibo cu e facultad tecnico nobo di Universidad di Aruba SISSTEM ta traha den cooperacion cu KU Leuven, e universidad di Leuven, Belgica. Esey ta trece Belgica y Aruba hopi mas cerca di otro y asina ta crea mas y miho oportunidadnan pa Aruba.
Otro echo di e bon relacion cu Belgica ta cu na e pais tin varios studiante Arubiano y tambe Aruba ya di basta tempo tin lasonan comercial fuerte y solido cu Belgica.
E reunion tabata uno fructifero den cual a enfoca riba e posibilidadnan grandi cu tin cu Belgica pa yuda Aruba diversifica y crece su economia y pa por ta mas fuerte y resiliente.