DVG ta yama atencion pa aumento di casonan di Rotavirus bou nos muchanan
ORANJESTAD – Directie Volksgezondheid (DVG), pa medio di su sistema di vigilancia epidemiologico, a nota un aumento den casonan di Rotavirus compara cu añanan anterior bou nos muchanan di 0 te cu 14 aña.
Rotavirus ta un di e causanan mas comun di gastroenteritis den muchanan. E virus ta hopi contagioso y ta transmiti facilmente pa medio di contacto cu man y superficienan of obhetonan contamina. Den lugarnan unda muchanan ta hunga y convivi hunto, manera scol, e virus por propaga rapidamente.
DVG ta pidi mayor di muchanan cu ta bishita kleuter y scol basico pa mantene alerta pa e siguiente sintomanan:
- Diarea.
- Sacamento.
- Keintura.
- Dolor di stoma.
- Perdida di apetito.
- Señalnan di deshidratacion, manera boca seco, menos orina, yora sin lagrima of cansancio extremo.
Si bo yiu ta presenta diarrea of sacamento, mantenele na cas y no mand'e scol. Esaki ta yuda proteha su compañeronan di klas y limita mas propagacion di e virus.
DVG ta recomenda tambe pa:
- Laba man di mucha regularmente cu awa y habon, especialmente despues di uza baño y prome di come.
- Limpia y desinfecta regularmente co’i hunga, mesa y otro superficienan cu ta mishi regularmente.
- Busca atencion medico si e mucha ta presenta señalnan di deshidratacion, no kier bebe, ta sigui saca of tin diarea awa frecuente of e sintomanan ta empeora.
Cu e colaboracion di mayor, scolnan y centro di cuido, nos por reduci e propagacion di Rotavirus y proteha salud di nos muchanan.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw.
