DVG ta registra aumento den casonan di keintura cu sintomanan respiratorio

ORANJESTAD – Directie Volksgezondheid (DVG) ta informa comunidad cu, segun datonan registra den su sistema di vigilancia di salud, ta observa un aumento den casonan di keintura acompaña pa sintomanan respiratorio y malestar gripal. 

Tambe ta registra casonan di influenza tipo B.

Riba social media tambe por nota diferente ciudadanonan compartiendo cu tin un andansa di griep cu ta causando malestar fuerte. 

Proteha esnan mas vulnerabel

DVG ta encurasha comunidad, y en especial e gruponan cu tin mas riesgo di complicacion, pa aplica medidanan preventivo. Esakinan ta:

  • adulto mayor di 60 aña y mas;
  • mucha chikito bou 5 aña;
  • hende muhe na estado;
  • persona cu malesanan cronico of condicionnan cu por debilita nan sistema inmunologico.

Pa e gruponan aki ta recomenda pa laba man frecuentemente cu awa y habon, of uza hand sanitizer, evita contacto cercano cu persona cu ta malo, sigui tuma remedi manera nan ta prescribi y considera vacunacion contra influenza. 

E vacuna contra influenza ta disponibel caba na Seccion di Malesanan Infeccioso di DVG. Pa mas informacion tocante vacunacion, por yama 522-4200.

Si bo ta malo, proteha otro

Si bo tin keintura, tos, dolor di garganta, dolor di curpa, dolor di cabez, cansancio of otro sintoma grip, keda cas y limita contacto cu otro persona mientras bo ta malo. Evita bishita personanan vulnerabel y evita luga cu hopi hende.

Tosa of nister den bo elleboog, laba bo man frecuentemente y percura pa tin bon ventilacion den cas. Bebe suficiente likido y tuma descanso.

No uza antibiotica riba bo mes, pasobra antibiotica no ta funciona contra virus manera influenza. Usa solamente medicamento segun indicacion di bo dokter of specialista.

Tuma contacto cu bo dokter di cas si bo sintomanan ta empeora, si keintura ta persisti, of si bo ta preocupa pa bo condicion di salud. Busca asistencia medico cu urgencia si tin dificultad pa hala rosea, dolor of presion fuerte den pecho, confusion, debilidad severo of otro señal di deterioro rapido.

Prevenir propagacion di malesanan respiratorio ta un responsabilidad comparti.  Si bo ta malo, keda cas. Cuida bo mes y proteha otro.

Bo Salud, Nos Prioridad.

Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw.

Pa keda semper informa:

Vacuna contra influenza