DVG ta recorda tur persona trahando den sector horeca pa download Aruba Health App
ORANJESTAD – Departamento di Salud Publico (DVG) ta recorda cu pronto su servicio di Certificado di Salud (e carchi berde) lo ta accesibel pa clientenan den e aplicacion Aruba Health App.
Cuminsando 15 di september, tur persona cu ta traha den sector horeca (cuminda y bebida) cu ta rekerí un Certificado di Salud pa por ehecuta nan trabou, lo por haya acceso na nan certificado di forma fácil, rápido y na tur momento via Aruba Health App.
Esnan cu no tin smartphone of no ta desea ricibi nan Certificado di Salud den Aruba Health App, por sigui busca esaki na Seccion di Inspeccion di Alimento y Higiena di DVG den forma imprimi, 10 dia di trabou despues cu a cumpli tur test necesario.
DVG ta conseha tur persona cu ta depende di un Certificado di Salud pa ehecuta nan trabou, pa cuminsa download Aruba Health App awe mes y pasa pa e proceso di registracion y crea un miembro. Tuma tempo pa encamina e proceso optimalmente. Pa instruccion con pa registra y crea un miembro, por subi na Facebook page di Aruba Health App pa wak e video di guia.
Aruba Health App ta un aplicacion cu ta cumpli cu tur exigencianan di seguridad pa garantisa privacidad di su usuarionan. Esaki ta e motibo pakico e proceso di registracion, creacion di miembro y verificacion por tuma un tiki mas tempo.
Pa mas informacion:
- Like nos Facebook page Directie Volksgezondheid DVG Aruba;
- Sigui nos riba Instagram directie_volksgezondheid_aruba;
- Bishita www.dvg.aw;
- Yama nos na 522-4200;
- Of manda un e-mail na servicio@dvg.aw.