DVG ta pone atencion riba impacto di uzo di pantaya riba salud di wowo y bienestar mental di muchanan na Aruba

ORANJESTAD - Durante e seminario “Breaking the Silence: Growing Up Under the Influence”, organisa pa Stichting HUNTO den colaboracion cu Directie Volksgezondheid (DVG), verpleegkundige Mary- Ann Kock, di seccion Cuido di Salud Hubenil (JGZ), a presenta un propuesta di investigacion tocante impacto di uzo di pantaya riba salud di wowo y bienestar mental di muchanan entre 9 y 12 aña na Aruba.

Durante su presentacion, Kock a destaca cu uzo di aparato digital entre muchanan a aumenta considerablemente den ultimo tempo. E desaroyo aki ta trece preocupacion tocante su posibel consecuencia riba salud fisico, desaroyo emocional y bienestar social di muchanan.

Entre e problemanan cu por ta relaciona cu uzo excesivo di pantaya tin cansancio di wowo, problema di vision, dolor di cabes y aumento di miopia. Ademas, investigacion internacional ta mustra asociacion entre cierto patronchi di uzo excesivo di pantaya y problema di soño, dificultad di concentracion, sintomanan di ansiedad y bienestar emocional reduci.

Investigacion enfoca riba muchanan di Aruba

E propuesta di investigacion di JGZ tin como meta pa examina e relacion entre cantidad di ora cu muchanan ta pasa dilanti di pantaya, nan salud di wowo y nan bienestar mental.

E investigacion ta contempla participacion di muchanan entre 9 y 12 aña, cu un poblacion di aproximadamente 3.135 mucha distribui entre 37 scol basico. E meta ta pa obtene un muestra di aproximadamente 627 mucha.

E informacion colecta lo yuda identifica patronchinan di uzo di pantaya y posibel factornan di risico, teniendo cuenta tambe cu influencia di famia, ambiente escolar y costumbernan diario.

E resultadonan lo por contribui na desaroyo di recomendacionnan y intervencionnan preventivo, tanto pa mayornan como pa scolnan y profesionalnan di salud.

Cu e iniciativa aki, DVG ta reafirma importancia di investigacion, educacion y prevencion pa promove un desaroyo saludabel di nos muchanan den un mundo cada bes mas digital.

Un balans saludabel entre uzo di tecnologia, actividad fisico, descanso y interaccion social ta esencial pa bienestar di nos muchanan.

Pa keda semper informa:

Seminario “Breaking the Silence: Growing Up Under the Influence”, organisa pa Stichting HUNTO den colaboracion cu Directie Volksgezondheid (DVG).

Comparti