DVG ta pidi tur biahero cu a regresa Aruba despues di vakantie, pa ta atento riba nan salud
ORANJESTAD – Directie Volksgezondheid (DVG) ta haci un yamada riba tur biahero cu recientemente a regresa di vakantie den exterior of di biahe pa exterior, pa ta atento riba nan estado di salud den e dianan despues di yega Aruba.
Mirando e desaroyo internacional, unda tin aumento di varios malesa infeccioso y di malesanan transmiti pa sangura, DVG ta enfatisa cu ta importante pa tur persona cu a biaha pa ta consciente di eventual sintomanan cu por indica un malesa importa.
Sintomanan cu mester tuma na serio ta entre otro:
- Keintura
- Dolor di cabes
- Dolor di scarnir (articulacionnan) of muscular
- Rash of manchanan riba curpa
- Tos
- Dolor di garganta
- Diarrea
- Sacamento
- Cansancio extremo
- Wowonan cora
- Kliernan hincha
E sintomanan aki por ta relaciona cu malesanan manera Chikungunya, Keintura Geel, Sarampi of otro infeccion gastro-intestinal.
DVG ta conseha tur biahero cu presenta un of mas di e sintomanan aki, pa tuma contacto cu nan dokter di cas mesora pa haya evaluacion medico y instruccion apropia. Dokter por determina si tin necesidad pa haci test adicional of tuma otro medidanan di prevencion.
Ta di suma importancia cu personanan cu ta busca atencion medico menciona nan historia di biahe reciente. E informacion ta esencial pa e evaluacion medico y pa yuda identifica mas lihe posibel un eventual malesa.
Door di informa na tempo, no solamente bo ta proteha bo mes, pero tambe bo ta contribui na proteccion di bo famia y comunidad.
DVG ta sigui monitoria e situacion regional y internacional y lo continua informa comunidad ora ta necesario.
Por comunica cu DVG yamando 522-4200 of manda un email na servicio@dvg.aw.