DVG ta lansa competencia di arte escolar pa promove doño di mascota responsabel

Awe ta lansa e competencia di arte escolar. Tur alumno di klas 1 pa klas 6 di scol basico por participa gratuitamente. E muchanan mester crea un pintura original y colorido cu ta ilustra un of mas cacho y pushi den cura, cu ta bon cuida pa un doño responsabel. Nan por incorpora aspecto di Ley di Cacho tambe den nan pintura, manera duna e mascota awa y cuminda adecuado, un luga sigur pa proteccion contra solo y awasero, atencion veterinario y mantene e mascota bou control.

Cada participante por entrega un pintura, cu e mucha mester traha pa na scol mes. Por adkiri e formulario di participación na scol mes of na DVG  y mester entrega e na e docente no mas tarda cu 30 di september 2026. DVG lo pasa busca e pinturanan na scol dia 1 y 2 di oktober.

Lo anuncia e ganadonan di cada klas dia 16 october riba e pagina di Directie Volksgezondheid DVG Aruba. E ganadonan lo ricibi un regalo durante un entrega special dia 23 october, parti merdia, na Bestuurskantoor. Lo transforma e pintura di e ganador of ganadora absoluto den un mural riba e futuro Centro di Rescate y Control.

E competencia aki ta forma parti di e campaña cu ta enfoca riba promove responsabilidad di doñonan di mascota, pa asina preveni abandono di animalnan riba caya. Cu e iniciativa aki, DVG kier sembra for di edad tempran e mensahe cu un mascota no ta un obheto, sino un ser bibo cu mester haya cuido, proteccion y amor durante henter su bida. 

Sea bo tambe un doño di mascota responsabel. Cada acto di responsabilidad ta salba un bida. Pa un comunidad harmonioso, un doño di mascota responsabel alabez.

Pa mas informacion:

• Facebook: Directie Volksgezondheid DVG Aruba
• Instagram: @directie_volksgezondheid_aruba
• App: Aruba Health App
• Website: www.dvg.aw 
• Telefon: 5224200
• Email: servicio@dvg.aw