DVG ta alerta comunidad pa tuma precaucion contra calor intenso na Aruba!

Segun Departamento Meteorologico Aruba (DMA), temperatura por alcansa 33°C, mientras cu indice di calor, esta e temperatura cu nos curpa ta sinti, por pasa 42°C, specialmente den e areanan cu hopi construccion (urbanisa).

E condicionnan aki ta resultado di un combinacion di temperatura y humedad halto cu biento debil, cu ta dificulta e proceso natural di nos curpa pa refresca su mes.

Kico esaki ta nifica pa nos salud?

Ora indice di calor ta halto, nos curpa mester traha mas duro pa mantene su temperatura normal. Exposicion prolonga na calor por ocasiona deshidratacion, cansancio pa calor y den casonan severo un golpe di calor ('heatstroke'), cu ta un emergencia medico.

DVG ta enfatisa cu specialmente muchanan chikito, adultonan di 60 aña y mas, personanan cu malesa cronico y esnan cu ta traha of haci actividad fisico den solo mester tuma precaucion extra.

DVG ta recomenda:

• Bebe suficiente awa durante dia, sin warda te ora bo sinti sed.
• Evita actividad fisico intenso den solo, especialmente entre 11:00 di mainta y 3:00 di atardi.
• Busca sombra y permanece den luganan fresco.
• Bisti paña liviano y fresco.
• Paga tino na sintomanan manera mareo, dolor di cabes, debilidad y sodamento excesivo.
• Presta atencion extra na muchanan, hende grandi y personanan vulnerabel.
• Pone extra atencion riba nos mascotanan percura cu nan tin sombra y suficiente awa. 

DVG ta recorda cu un golpe di calor por pone bida na peliger. Si un persona presenta confusion, perde conocemento of tin otro sintomanan severo di calor, busca asistencia medico di emergencia inmediatamente.

DVG ta sigui e informacion meteorologico y ta recomenda comunidad pa mantene nan mes informa tocante e condicionnan di tempo. Y tuma precaucion pa proteha nan salud.